Madaxweynaha Soomaaliya Xasan Sheekh Maxamuud iyo wafdi uu hoggaaminayo ayaa u ambabaxay dalka Mareykanka, halkaas oo uu kaga qeybgalayo shirka Golaha Guud ee Qaramada Midoobay ee ka dhacaya magaalada New York.
Ilo ku dhow madaxtooyada ayaa sheegay in Madaxweynaha iyo wafdigiisu ay u safreen Mareykanka, iyadoo shirka Golaha Guud ee Qaramada Midoobay uu furmayo maalinta berri ah.
Madaxweyne Xasan Sheekh ayaa la filayaa inuu khudbad ka jeediyo shirka, isagoo diiradda saari doona xaaladda guud ee Soomaaliya, gaar ahaan baahida loo qabo in beesha caalamku kordhiso taageerada ay siiso Soomaaliya ee dhinacyada amniga iyo dagaalka ka dhanka ah Al-Shabaab.
Sidoo kale, Madaxweynaha ayaa la filayaa inuu ka hadlo xaaladda siyaasadeed iyo amni ee Soomaaliya, iyo muhiimadda ay leedahay in la xoojiyo taageerada loo fidiyo ciidamada qalabka sida ee Soomaaliya.
Dowladda Federaalka Soomaaliya ayaa la filayaa inay fursadda shirka caalamiga ah u adeegsato in ay indhaha caalamka ku soo jeediso xaaladaha bani’aadannimo ee dalka, iyadoo sidoo kale dalbanaysa in la kordhiyo gargaarka iyo maalgashiga caalamiga ah ee Soomaaliya.
Inta uu ku sugan yahay New York, Madaxweyne Xasan Sheekh ayaa sidoo kale la filayaa inuu ka qeyb galo kulamo rasmi ah iyo kuwo dhinac socda, kuwaas oo uu kula yeelan doono saraakiil sare oo ka tirsan Qaramada Midoobay, mas’uuliyiin ka tirsan dowladda Mareykanka iyo madaxda dalalka kale ee xubnaha ka ah Qaramada Midoobay.
Safarka Madaxweynaha ayaa ku soo beegmaya xilli Soomaaliya ay xubin ka tahay Golaha Ammaanka ee Qaramada Midoobay, taas oo Dowladda siinaysa fursad ay si toos ah uga qeybqaadato doodaha iyo go’aannada la xiriira nabadda iyo amniga caalamka.
