Wasaaradda Waxbarashada ee Dowladda Federaalka Soomaaliya ayaa maanta si rasmi ah u shaacisay jadwalka imtixaanaadka qaran ee dugsiyada sare ee sannadka 2025-ka, kuwaas oo laga qaadi doono ardayda dhigata dugsiyada sare ee dalka.
Wasaaraddu waxay sheegtay in imtixaanaadka kama dambaysta ah ay ardaydu u fariisan doonaan inta u dhaxaysa 20-ka illaa 25-ka Juun.
Ku dhowaead 40,000 oo arday oo ka kala socda dowlad-goboleedyada iyo gobolka Banaadir ayaa sanadkan ka qeyb geli doona imtixaanaadka qaranka.
Wasaaradda ayaa xustay in imtixaanaadka qaranku yahay tallaabo muhiim u ah xoojinta nidaamka waxbarashada Soomaaliya iyo hubinta hannaan midysan oo lagu qiimeeyo heerka waxbarasho ee ardayda dalka oo dhan.
Sanadkii hore, tirada ardayda u fariisatay imtixaanaadka qaranka ee dugsiyada sare ayaa gaartay 38,471 arday.
Dhanka kale, jadwalka imtixaanaadka fasalka 8-aad ee dugsiyada hoose dhexe ee gobolka Banaadir ayaa la geli doonaa inta u dhaxaysa 15-ka illaa 18-ka Juun.
