Bangiga Dhexe ee Soomaaliya ayaa shaaciyay qorshe lagu ballaarinayo Nidaamka Lacag-bixinta Degdegga ah (SIPS), si loogu xiro bangiyada ganacsiga, shirkadaha adeegyada lacagaha moobillada iyo shabakadaha lacag-bixinta ee gobolka, taasoo qeyb ka ah dadaallada lagu casriyeynayo adeegyada maaliyadeed iyo xoojinta isdhexgalka dhaqaale ee Soomaaliya.
Guddoomiyaha Bangiga Dhexe ee Soomaaliya, Cabdiraxmaan Maxamed Cabdullaahi, ayaa sheegay in nidaamka lacag-bixinta dalka uu muddo dheer ahaa mid kala go’an, iyadoo bangiyada iyo shirkadaha lacagaha moobilladu ay ku shaqeynayeen hannaan kala duwan, arrintaas oo caqabad ku ahayd isku xirnaanta adeegyada iyo fidinta adeegyada maaliyadeed.
Sida uu sheegay, Nidaamka Qaranka ee Lacag-bixinta oo la hirgeliyay sannadkii 2021 ayaa casriyeeyay wareejinta lacagaha waaweyn ee bangiyada dhexdooda, hase yeeshee uusan daboolin baahida lacag-bixinnada maalinlaha ah ee shacabka iyo ganacsiyada.
Guddoomiyuhu wuxuu xusay in SIPS, oo la daah-furay Janaayo 2025 kuna dhisan halbeegga caalamiga ah ee ISO 20022, uu awood u siinayo in lacagaha si degdeg ah loogu kala wareejiyo hay’adaha ku xiran nidaamka. Marka uu si buuxda u hirgalo, wuxuu isku xiri doonaa dhammaan 14-ka bangi ee ganacsiga iyo siddeed shirkadood oo bixiya adeegyada lacagaha moobillada iyo boorsooyinka elektaroonigga ah.
Nidaamkan ayaa la filayaa inuu fududeeyo lacag-bixinnada u dhexeeya shakhsiyaadka, ganacsatada, hay’adaha dowladda iyo shirkadaha, iyadoo sidoo kale lagu xiri doono nidaamka lacag-bixinta QR-ka ee SOMQR, si loo dardargeliyo lacag-bixinta dijitaalka ah, gaar ahaan ganacsiyada yaryar.
Bangiga Dhexe ayaa sidoo kale qorsheynaya in dhammaan shirkadaha lacagaha moobillada lagu daro nidaamka, si malaayiin isticmaale oo adeegyadaas ku tiirsan ay uga faa’iideystaan hal shabakad oo mideysan.
Qorshaha ayaa sidoo kale dhigaya in Soomaaliya ay ka hor dhammaadka sannadka 2026 ku xirto SIPS nidaamka Pan-African Payment and Settlement System (PAPSS), taasoo qayb ka ah dadaallada lagu xoojinayo isdhexgalka maaliyadeed ee Afrika, kaddib ku biiristii Soomaaliya ee Bulshada Bariga Afrika (EAC).
Guddoomiyaha Bangiga Dhexe ayaa sheegay in dhismaha nidaam lacag-bixin oo hufan uu yahay mudnaan istaraatiiji ah oo muhiim u ah kobaca dhaqaalaha dalka, gaar ahaan maadaama xawaaladuhu ay weli yihiin laf-dhabarta dakhliga ay helaan qoysas badan oo Soomaaliyeed.
