Wufuud uu hor kacayo gudoomiyaha barlamaanka dawlada federalka prof.Jawaari oo kismaayo ka degey.

0
216

Guddoomiyaha Baarlamaanka Soomaaliya Maxamed Sh. Cusmaan [Jawaari] oo uu wehliyo guddoomiye ku xigeenkiisa labaad, Mahad Cabdalla Cawad, wasiirro ka tirsan xukuumadda iyo xildhibaanno baarlamaanka Somalia u metelaya shirka wadatashiga Qaran ee doorashooyinka ayaa duhurnimadii maanta gaaray magaalada Kismaayo ee gobolka Jubbada Hoose.

Jawaari iyo Wafdigiisa waxaa Garoonka Diyaaradaha Kismaayo kusoo dhaweeyay Ra’iisul wasaaraha Somalia, Cumar C/rashiid Cali, madaxweynaha Jubbaland, xildhibaano ka tirsan baarlamaanka Soomaaliya oo horay u joogay magaalada Kismaayo iyo mas’uuliyiin ka kala tirsan Dowladda Federaalka Soomaaliya iyo maamluka Jubbaland.

Madaxweynaha Jubbaland, Axmed Maxamed Islaam (Axmed Madoobe) oo ka hadlay soo dhaweynta wafdiga kaddib ayaa tilmaamay inuu aad ugu faraxsan yahay in guddoomiyaha baarlamaanka uu yimaado Kismaayo markii ugu horreysay, isla markaana hadda ay yihiin wafdiga muhiimsan ee imaanaya, waxaana uu xusay in ujeeddada uu u yimid ay tahay ka qayb-galka shirka looga tashanayo doorashooyinka 2016-ka ka dhacaya dalka oo dhowaan Kismaayo ka furmi doona.

Ugu dambeyn, guddoomiyaha baarlamaanka Somalia, Jawaari oo isna dhankiisa ka hadlay goobta ayaa ka mahad-celiyay sida lasoo dhaweeyey wafdigiisa; wuxuuna tilmaamay inuu rajeynayo in shirka wadatashiga Qaran ay kasoo baxaan qodobo dhaxal-gal u ah ummadda Soomaaliyeed oo dhan; waxaana loogu magac-dari doono go’aankii Kismaayo.