Guddiga Doorashooyinka Dadban, ayaa sheegay in la guda-galay Doorashooyinka Aqalka Hoose ee Baarlamaanka Soomaaliya, iyadoo dhowaan la xareyn doono Ergooyinka soo dooranaya Xildhibaanada Aqalka Hoose.
Guddoomiyaha Guddiga Doorashooyinka Dadban ee Sannadkan, Avv. Cuma Dhagey ayaa sheegay in maamul-goboleedyada Somalia ay billaabaan soo Gudbinta liisaska ergooyinka, isagoo ugu baaqay maamullada kale inay soo dhameystiraan liiska ku haray
“Ergooyinka illaa hadda lasoo xareeyay, waxaa ugu horeeyay Maamulka Jubbaland oo 43-ergo soo dhameystiray , waxaa kaloo soo diyaariyay Maamulka Koofur-galbeed 57-ergo,” ayuu yiri Guddoomiyaha Guddiga Doorashooyinka Dadban ee Somalia.
Sidoo kale, Avv. Cumar Dhagey ayaa ugu baaqay Maamullada Puntland iyo Galmudug in ay soo dhameystiraan tirada guud ee laga doonayo oo uu xusay inay qaybo ka mid ah diyaariyeen. Isagoo intaas ku daray in doorashada Aqalka Hoose ay rajeynayaan inay ku dhacdo waqtigeeda, ayna billaabatay 23-kii bishan Oktoobar oo ku beegnayd shalay.
“Rajadu way wanaagsan tahay, marka aad ka qiyaas qaadato doorashadii Aqalka Sare oo waqtigeedii ku dhacday, mida Aqalka Hoose, waxaan aad u rajeynaynaa inay waqtigeeda ku dhici doonto,” ayuu hadalkiisa raaciyay Avv. Dhagey.
Ugu dambeyn, Doorashada Aqalka Hoose ee Baarlamaanka cusub ee Dalka ayaa Qorshuhu yahay in lagu soo doorto 17-maalin gudahood, Gaar ahaan inta u dhexeysa 23-ka bishan Oktoobar illaa 10-ka bisha November 2016.
warsom2011@gmail.com
