Siddeed badmaaxiin oo u dhashay dalka Masar ayaa soo gaaray magaalada Muqdisho kaddib markii laga soo daayay afduub ay muddo bilo ah ugu xirnaayeen markabka M/T Eureka, iyadoo hadda la diyaarinayo sidii loogu celin lahaa magaalada Qaahira.
Badmaaxiinta ayaa Sabtidii shalay soo gaaray garoonka diyaaradaha Aadan Cadde ee Muqdisho, halkaas oo uu ku soo dhaweeyay safiirka Masar ee Soomaaliya. Sida ay sheegtay Wasaaradda Arrimaha Dibadda Masar, badmaaxiinta waxaa loo qaaday xarunta safaaradda, halkaas oo loo diyaariyay hoy iyo amni, iyadoo la sugayo safarkooda ku aaddan Masar.
Wasaaradda Arrimaha Dibadda Masar ayaa sheegtay in safaaradda ay si joogto ah ula xiriiraysay badmaaxiinta, qoysaskooda iyo dhinacyada ay khusayso tan iyo markii ay bilaabatay xaaladdooda.
Dadaallada lagu xallinayay arrinta ayaa sidoo kale waxaa qayb ka ahaa xiriir ay safaaradda Masar la sameysay mas’uuliyiin ka tirsan dowladda federaalka Soomaaliya, maamulka Puntland, milkiilayaasha markabka iyo dhinacyada kale ee ay khusayso.
Wasaaradda Arrimaha Dibadda Masar ayaa horay u xaqiijisay in siddeeddan badmaaxiin laga sii daayay markabka M/T Eureka, kaas oo lagu hayay meel ka baxsan xeebaha Puntland tan iyo 2-dii May 2026.
Dhanka kale, safiirka Soomaaliya ee Qaahira, Cali Cabdi Awaare, ayaa sheegay inuu xiriir la sameeyay badmaaxiinta, isagoo xaqiijiyay in dhammaantood ay xaalad wanaagsan ku jiraan oo ay ammaan yihiin.
Masar iyo Soomaaliya ayaa sidoo kale sii wada isku-duwidda dadaallada lagu xaqiijinayo in badmaaxiinta si nabad ah loogu celiyo dalkooda.
