Wasiirka Gaashaandhigga Soomaaliya Axmed Macallin Fiqi ayaa sheegay in amniga magaalada Muqdisho la gaarsiiyay heer sare, isaga oo sheegay in dowladda aysan ka tanaasuleyn tallaabooyinka lagu sugayo amniga caasimadda.
Fiqi ayaa sheegay in Muqdisho ay gaartay heerka amnigeeda lagu qiimeeyo darajada “A”, isagoo tilmaamay in dowladda ay rajaynayso inay gaarsiiso heer ka sarreeya.
“Kama gorgortamayno amniga. Ma oggolaanayno in cid kasta oo gacan u soo taagata amniga ay dhibaato u geysato,” ayuu yiri wasiirku.
Wasiirka ayaa sidoo kale si adag uga digay dib ugu laabashada qabyaaladda iyo kala qaybinta xaafadaha Muqdisho, isagoo sheegay in aan la aqbali karin in magaalada dib loogu celiyo xaalad ay xaafaduhu ku salaysnaadaan qabiil.
Fiqi ayaa sheegay in dowladda federaalku aysan matalin qabiillo gaar ah, balse ay waddo dowladnimo ay hormuud u yihiin madaxweyne Xasan Sheekh Maxamuud iyo Ra’iisul Wasaare Xamse Cabdi Barre.
“Xasan Sheekh reerkii sii ma wato, Ra’iisul Wasaare Xamsana reerkii sii ma wato. Dowlad bay wadaan. Annaguna dhammaanteen reer ma wadno, dowlad baan wadnaa,” ayuu yiri.
Wasiirka ayaa sidoo kale dhaliilay dadka sheegaya in Muqdisho aysan amni ahayn ama ciidamada dowladda ay burbureen, isagoo sheegay in qaar ka mid ah hadalladaas ay dhaawacayaan dadaallada lagu sugayo amniga.
Wuxuu sheegay in Al-Shabaab lagu sameeyay hoos u dhac weyn, balse uu jiro dadaal uu ku tilmaamay mid lagu doonayo in kooxda fursad loogu abuuro Muqdisho.
Fiqi ayaa sidoo kale difaacay baraha kontoroollada ee magaalada, isagoo su’aal geliyay sababta ay dadka qaar uga soo horjeedaan baaritaanka gaadiidka iyo dadka lagu sameeyo goobahaas.
Wasiirka ayaa hadalkiisa ku sheegay in sugidda amniga Muqdisho ay tahay masuuliyad dowladeed, isla markaana aan loo oggolaan doonin cid uu sheegay inay isku daydo inay amniga magaalada wax u dhinto ama dib u soo celiso kala qaybsanaantii qabiilka.