Wafdi heer sare ah oo ka socday Soomaaliya ayaa soo gabagabeeyay booqasho 10 maalmood ah oo uu ku tagay Pakistan, taas oo looga gol lahaa in Soomaaliya ay wax ka barato khibradda Pakistan ee dhijitaaleynta adeegyada dadweynaha iyo sidii loo horumarin lahaa adeegyada dhijitaalka ah ee dowladda.
Wafdiga waxaa hoggaaminayay Abdiwali Ali Abdulle, Agaasimaha Guud ee Hay’adda Aqoonsiga iyo Diiwaangelinta Qaranka Soomaaliya (NIRA), waxaana ka mid ahaa mas’uuliyiin sare oo ka socday NIRA, Wasaaradda Maaliyadda, Bangiga Dhexe ee Soomaaliya iyo hay’ado kale oo maaliyadeed iyo kuwa horumarineed.
Booqashada ayaa si wadajir ah waxaa u soo qabanqaabiyay xafiisyada Soomaaliya iyo Pakistan ee Barnaamijka Horumarinta Qaramada Midoobay (UNDP).
Intii uu socday barnaamijku, mas’uuliyiinta Soomaaliya waxay kulamo la yeesheen hay’adaha Pakistan ee ka shaqeeya aqoonsiga dhijitaalka ah, dowladnimada dhijitaalka ah, ilaalinta bulshada, canshuuraha, lacag-bixinta dhijitaalka ah iyo adeegyada muwaadiniinta.
Wafdiga ayaa sidoo kale ka bartay khibradda Pakistan ee ku saabsan sidii isbeddelka dhijitaalka ah looga dhigi lahaa mid loo dhan yahay, ammaan ah, isla-xisaabtan leh, isla markaana ku saleysan dhowrista xuquuqda aadanaha. Waxaa tusaale ahaan la soo bandhigay tallaabada Golaha Senate-ka Pakistan uu ugu gudbay nidaamka Baarlamaanka aan waraaqaha ku shaqeyn ee loo yaqaan e-Parliament.
Abdiwali Ali Abdulle ayaa sheegay in booqashadu ay Soomaaliya siisay fursad ay kaga faa’iidaysato waayo-aragnimada Pakistan, isla markaana ay aqoonsato hababka lagu dabaqi karo xaaladda Soomaaliya.
Wuxuu sheegay in Pakistan ay leedahay khibrad muhiim ah oo ku saabsan aqoonsiga dhijitaalka ah, maaliyadda dhijitaalka ah, adeegyada ilaalinta bulshada iyo isku-xirka nidaamyada kala duwan. Dhanka kale, ayuu tilmaamay in Soomaaliya ay leedahay khibrad dhinaca lacagaha mobilka iyo adeegsiga degdegga ah ee adeegyada dhijitaalka ah, taas oo iyaduna casharro u noqon karta Pakistan.
Ka qaybgalayaasha ayaa sidoo kale ansixiyay Qorshaha Waxqabadka Iskaashiga Soomaaliya iyo Pakistan, kaas oo qeexaya meelaha ay labada dhinac sii wadi doonaan wada shaqaynta.
Qorshahan ayaa diiradda saaraya aqoonsiga aasaasiga ah iyo aqoonsiga sharci, kaabayaasha dhijitaalka ah ee adeegyada dadweynaha iyo dowladnimada, isku-xirka nidaamyada, xog-isweydaarsiga ammaan ah, ka-qaybgalka maaliyadeed iyo maaliyadda dadweynaha ee dhijitaalka ah.
Jama Hassan, oo ah la-taliyaha safaaradda Soomaaliya ee Pakistan, ayaa sheegay in barnaamijku Soomaaliya siiyay faham muhiim ah oo ku saabsan nidaamka aqoonsiga ee Pakistan iyo adeegyada ballaaran ee e-dowladeed.
Wuxuu carrabka ku adkeeyay in aqoonsiga shaqeynaya uusan ku koobnayn lambar ama kayd xogeed oo keliya, balse uu muhiim yahay in nidaamyada aqoonsiga lagu xiro adeegyada dadweynaha ee ay muwaadiniintu u baahan yihiin.
Dhankiisa, Dr. Samuel Rizk, wakiilka joogtada ah ee UNDP Pakistan, ayaa sheegay in aqoonsiga sharci uu saldhig u yahay dowlad loo dhan yahay, maadaama uu dadka u fududeeyo helitaanka adeegyada dowladda, ilaalinta bulshada iyo fursadaha maaliyadeed.
Rizk ayaa sheegay in iskaashiga UNDP iyo Hay’adda Aqoonsiga Qaranka Pakistan (NADRA) uu gacan ka geystay in in ka badan hal milyan oo haween ah ay helaan dukumentiyada aqoonsiga.
