Wafti uu hoggaaminayo wasiirka wasaaradda dastuurka C/Ramaan xoosh Jibriil ayaa maanta soo gaaray caasimadda Puntland ee Garoowe, wuxuuna xarunta madaxtooyada kula kulmay Madaxweynaha Puntland Cabdiweli Maxamed Cali Gaas.
Wasiirka oo socdaalkiisa Garoowe ay ku weheliyay masuuliyiin ka tirsan golayaasha dowladda federaalka, waxaa garoonka diyaaradaha ku soo dhaweeeyay Wasiirka Wasaarada Dastuurka Puntland Cali Ciise Oogle, waxaaana uu madaxweynaha kala hadlay muhiimada uu xambaarsanaa socdaalka ay weftigani kusoo gadheen Puntland
Wuxuu sheegay inay u socdaan arrimo la xiriira dib u eegista dastuurka Soomaaliya, kaasi oo ay dawladda Fadaraalka Soomaaliya ku hawlan tahay dib u habayntiisa muddoo la soo dhaafay
” booqashadani runtii waxay daba socotey shirweyn oo hadda ka hor ka dhacay muqdisho si uu wasiirku usoo arko dawladd goboleedyadii oo dhan, nasiib waxaan u helnay Puntland inuu yimaado isaga iyo weftigiisa si loogu kuur galo dib u eegista dastuurka Soomaaliya oo ah hawlweyn oo sugaysa Soomaaliya” ayuu yiri Wasiirka Dastuurka Puntland.
Wasiirka Wasaaradda Dastuurka DFS Cabdi Xoosh Jibriil ayaa sheegay dhankiisa in ka wasaarad ahaan ay muhiimad gaara u leedahay imaanshaha Puntland, madaama Punatland ay tahay hooyadda Maamul goboleedyada dalka, isla markaana ay wax badan ku kordhin karto kana saarikarto dastuurka DFS.
”Waxaan dooranay runtii inaan kusoo hormarno Puntland, sababtuna waxa weeye waa calaamadii fedaraalka waana curadkii Maamul goboleedyada Dalka, waana meeeshii lagu qaban jirey shirarka Dastuurka saas awgeed waxaa sharaf noo noqotay inaan nimadno Puntland gaar ahaan Garoowe” ayuu yiri Wasiirka Dastuurka Soomaaliya.
Toddobaadkii hore, gollaha xukuumadda Puntland waxay ku sheegeen war-murtiyeed ay soo saareen in loo baahan yahay in dastuurka si sal-balaaran oo ku dhisan is-aaminaad inay ugu wada qeyb-galaan dhammaan maamulada .Soomaaliya, islamarkaana dastuurka dhamaystirkiisa uu yahay shaqada ugu horraysa ee xukuumadda federaalka hortaala.
warsom2011@gmail.com
