Madax dhaqameedka Galmudug ayaa si hagar la’aan ah u ballan qaaday in ay si hagar la’aan ah u garab istaagi doonaan hadafka dowladda federaalka Soomaaliya ee ah in dalka laga xoreeyo argagixisada, kadib kulan ay xalay magaalada Dhuusamareeb ee xarunta maamulka Galmudug kula yeesheen Madaxweyne Xasan Sheekh Maxamuud.
Madaxweyne Maxamuud ayaa hoosta ka xariiqay doorka muhiimka ah ee odayaasha dhaqanka Galmudug ay ku leeyihiin istaraatiijiyadda ka hortagga argagixisada. Waxa uu ku nuux-nuux saday inay hormuud ka yihiin abaabulka bulshada, dhiirigelinta, hagid iyo garab istaaga ciidamada qalabka sida, si ay uga xoreeyaan deegaanada ay kaga harsan yihiin Al-Shabaab ee ku sugan deegaanada maamulka Galmudug.
xayaysiisyada
Madaxweyne Xasan Sheekh oo ka hadlay caqabada weyn ee Galmudug ka heysata dhanka Khawaarijta, oo ah erey tilmaamaya kuwa ka leexday Diinta Islaamka, ayaa Madaxweyne Xasan Sheekh tilmaamay mas’uuliyadda odayaashu ka saaran tahay mideynta shacabka iyo inay kaalin mug leh ka qaataan sidii ciidamada Qaranka ay u ciribtiri lahaayeen kooxaha argagixisada ah ee daadinaya dhiigga dadka aan waxba galabsan.
Dhinaca kale, Ra’iisul Wasaaraha Soomaaliya Xamse Cabdi Barre ayaa ku dhawaaqay in la billaabay wajiga labaad ee howlgalka ka dhanka ah Al-shabaab Axaddii lasoo dhaafay. Waxa uu shaaca ka qaaday in muddo kooban la soo gaba gabeyn doono howlgalka ka dhanka ah Al-Shabaab ee ka socda Maamul Goboleedyada Galmudug iyo Hirshabeelle, iyadoo howlgalka xigana la qorsheynayo in laga fuliyo deegaanada Jubbaland iyo Koonfur Galbeed.
Ra’iisul Wasaare Xamse ayaa sidoo kale shaaca ka qaaday in dowladdu ay diyaarisay ku dhawaad 10,000 oo askari oo ka qeyb qaadan doona wajigan labaad, kuwaasi oo u taagan ciribtirka saameynta Al-Shabaab.
