Wasaaradda Batroolka iyo Kheyraadka Macdanta ee Dowladda Federaalka Soomaaliya ayaa heshiis isfaham (MoU) la saxiixatay gobolka West Virginia ee dalka United States, kaas oo diiradda saaraya iskaashi ku saabsan sahminta, soo saarista, farsamaynta iyo horumarinta macdanta muhiimka ah.
Sida ay sheegtay wasaaraddu, heshiiskan ayaa ujeedkiisu yahay in la dhiso qaab iskaashi oo kor u qaada maalgashiga, is-weydaarsiga aqoonta farsamada iyo horumarinta silsiladda qiimaha ee macdanta Soomaaliya, sida lagu sheegay war-saxaafadeed ay soo saartay Wasaaradda Batroolka.
Heshiiska waxaa dhinaca Soomaaliya u saxiixay wasiirka batroolka iyo kheyraadka macdanta, Dahir Shire Mohamed, halka dhinaca gobolka West Virginia uu u saxiixay xoghayaha Senate-ka gobolka, Kris Warner.
Munaasabadda saxiixa ayaa ka dhacday aqalka Senate-ka ee gobolka West Virginia, waxaana goob joog ka ahaa wafdi ka socday Dowladda Federaalka Soomaaliya oo uu hoggaaminayay ra’iisul wasaare ku-xigeenka dalka, Salah Ahmed Jama.
Dhinaca gobolka West Virginia, kulanka waxaa sidoo kale ka qayb galay xubno ka tirsan Senate-ka gobolka, oo uu ku jiro madaxweynaha Senate-ka isla markaana ah ku-xigeenka guddoomiyaha gobolka (Lieutenant Governor), Randy Smith.
War-saxaafadeedka ayaa lagu sheegay in Senate-ka gobolka West Virginia uu sidoo kale soo saaray qaraar rasmi ah oo taageeraya iskaashiga labada dhinac, taas oo muujinaysa muhiimadda istaraatiijiga ah ee iskaashigan cusub iyo rabitaanka gobolka ee xoojinta xiriirka dhaqaale iyo farsamo ee Soomaaliya.
Sida lagu sheegay heshiiska, iskaashigu wuxuu diiradda saari doonaa sahminta iyo soo saarista macdanta muhiimka ah, horumarinta farsamaynta macdanta si loo kordhiyo qiimaha gudaha, iyo is-weydaarsiga aqoonta iyo khibradda farsamo.
Heshiiska ayaa sidoo kale la sheegay inuu dhiirrigelinayo shirkadaha Mareykanka inay sahamiyaan fursadaha maalgashi ee ka jira Soomaaliya, gaar ahaan dhinacyada sahminta, soo saarista iyo farsamaynta macdanta.
Dowladda Federaalka Soomaaliya ayaa heshiiskan ku tilmaantay tallaabo ka mid ah dadaallada lagu horumarinayo kheyraadka dabiiciga ah ee dalka si hufan, iyadoo la doonayo in la soo jiito maalgashi caalami ah isla markaana la kobciyo dhaqaalaha iyo fursadaha shaqo.
