Shirkadaha korontada ee BECO, Muqdisho Power iyo Blue Sky ayaa ku dhawaaqay inay kordhiyeen qiimaha korontada, iyagoo sabab uga dhigay sare u kaca ku yimid qiimaha shidaalka ee dalka.
Shirkaduhu waxay tilmaameen in qiimaha shidaalka ee Soomaaliya uu kordhay in ka badan 70 boqolkiiba, taas oo ay sheegeen inay ku qasabtay inay dib u eegis ku sameeyaan qiimaha korontada si ay u sii wadaan adeegga ay bulshada u hayaan.
Sida ku cad go’aanka shirkadaha, waxaa qiimaha korontada lagu kordhinayaa shan senti halkii kilowaat-saac, laga bilaabo maanta oo ku beegan 25-ka Oktoobar 2026.
Shirkaduhu waxay sheegeen in kororka lagu sameeyay qiimaha korontadu uu yahay mid hooseeya marka loo eego kororka ku yimid qiimaha shidaalka, iyagoo sheegay inay tixgeliyeen duruufaha dhaqaale ee adag ee ay bulshada ku jirto.
Waxay sidoo kale muujiyeen inay ka xun yihiin saameynta uu sare u kaca shidaalku ku yeeshay macaamiisha, iyagoo rajo ka muujiyay in xaaladdu isbeddeli doonto mustaqbalka dhow.
Shirkadaha BECO, Muqdisho Power iyo Blue Sky ayaa ka mid ah shirkadaha bixiya adeegga korontada ee Muqdisho iyo deegaanno kale oo dalka ka tirsan.