(Reuters) – Ugu yaraan 36 qof ayaa ku dhintay maanta oo Talaado ah rabshado ka dhacay guud ahaan Soomaaliya, kuwaas oo isugu jira dagaallo culus oo ka dhacay maamul goboleedka Puntland iyo qaraxyo bambaano oo ka dhacay gobolka Shabeellaha Hoose ee dalka, sida ay sheegeen goobjoogayaal.
Dhanka Puntland, dagaal culus ayaa subaxnimadii hore ee Talaadada ka dhacay magaalada Garoowe ee xarunta dowlad goboleedka Puntland, iyadoo baarlamaanka deegaanku ay ka doodayeen wax ka bedelka habka cod bixinta.
Ugu yaraan 26 qof ayaa ku dhintay dagaalka, 16 ka mid ahina waa askar, halka 30 kalena ay ku dhaawacmeen, sida uu Reuters u sheegay Dr. Cabdirsaaq Axmed oo ka hawlgala Isbitaalka guud ee Garoowe oo meydadka qaar la geeyay.
Saddex goob-joogayaal oo kale ayaa ku tilmaamay dagaal culus oo qarxay ka dib markii ay kooxaha mucaaradka ku eedeeyeen hoggaamiyaha Puntland, Siciid Cabdullaahi Deni, inuu doonayo isbeddel dastuuri ah oo u kordhiya muddada uu xafiiska joogo wixii ka dambeeya bisha Janaayo ee sannadka soo socda, ama gacan ka geysanaya in codbixinta la dhiibo.
Dowladda Puntland ayaa barteeda Facebook-ga ku sheegtay in baarlamaanka maamul goboleedka uu u codeeyay in wax ka bedel lagu sameeyo dastuurka, isla markaana ay dhici doonto doodo iyo codeyn kale.
Reuters isla markiiba uma suurtagelin in ay la xiriirto mas’uuliyiinta maxalliga ah ama federaalka si ay faallo uga bixiyaan rabshadaha ka socda Puntland, ee dhaca xeebaha waqooyi-bari ee dalka ee Badweynta Hindiya.
“Dagaalku wuxuu isla markiiba qarxay ka dib markii baarlamaanka Puntland u codeeyeen doorasho hal qof iyo cod ah oo ay ku tartamayaan xisbiyo badan,” Faarax Cismaan oo ka mid ah odayaasha deegaanka ayaa sidaas yidhi. “Xildhibaanadii weli guriga ayay ku sugan yihiin, waxaana magaalada ka socda rasaas xooggan oo la is weydaarsanayo. Waa dagaal aad u daran”.
“Garoowe waxaa ka buuxa ciidamo iska soo horjeeda. Wadooyinka oo dhan waa xiran yihiin, ganacsiga oo dhanna waa xiran yahay,” ayuu Cismaan hadalkiisa ku daray.
Goob-jooge kale oo lagu magacaabo Seynab Cumar oo ah hooyo haysata saddex carruur ah ayaa wakaaladda wararka ee Reuters u sheegtay inay aragtay ugu yaraan laba qof oo rayid ah oo dhintay iyo toddobo kale oo ay dhaawacyo ka soo gaareen rasaasta. Ma cadda in maydadka iyo dhaawacyada uu Cumar arkay ay ka mid yihiin kuwa uu dhakhtarku sheegay in isbitaalka la keenay.
Rabshado kala duwan oo ka dhacay gobolka Shabeellaha Hoose ee Soomaaliya ugu yaraan toban qof ayaa ku dhintay ka dib markii bambaanooyin laga hago meelaha fog laga hago ay ku qarxeen deegaanka Bariire oo qiyaastii 50 kiiloomitir (31 mayl) koonfur-galbeed ka xiga caasimadda Soomaaliya ee Muqdisho Talaadadii, dadka deegaanka iyo askari ayaa sheegay.
“Marka hore bam ayaa qarxay waxaana ku dhintay dhowr qof oo rayid ah. Kadibna dad badan oo rayid ah iyo anaga oo askar ah ayaa u nimid inaan u gurmano dadkii ku waxyeeloobay qarixii koowaad, markii dad badan ay isku soo baxeen, bamkii labaad ee fogaa ayaa dhacay,” Nuur Diiriye, oo ah askariga ayaa u sheegay Reuters, isagoo intaa ku daray in laga yaabo in dhimashadu ay sii korodho.
Xigasho: Reuters
