M/weynaha Jubaland oo Ka Hadley arrimo La Xidhiidha Gobolka Gedo iyo Khilaafkii Ragaadiyey Isfahamka Maamulka JLND iyo Gobolkaas.

0
261
Madaxweynaha maamulka Jubbaland Axmed Maxamed Islaam ayaa si faahfaahsan uga hadlay isbadalka cusub ee dalka ka hirgalay oo uu sheegay inuu soo dhaweynayo, isagoona xusay in mudo la sugaayay doorashooyinka guud ee dalka ka dhacay.

Madaxweyne axmed Madoobe ayaa ugu horeyn u mahad celiyay madaxweynahii hore ee dowlada Federaalka ah Maxamed Cabdullahi Farmaajo oo shantii sano ee lasoo dhaafay dalka soo hogaaminayay isla markana aqbalay natiijada doorashadii looga guuleystay.

Axmed Madoobe ayaa sidoo kale u mahad celiyay Raysal Wasaare Maxamed Xuseen Rooble oo uu tilmaamay inuu si naf hurnimo ah ugu istaagay sidii dalka ay uga dhici lahayd doorasho xalaal ah oo loo dhan yahay natiijadeedana la wada aqbalay, islamarkaana sido kale guddiyada doorashooyinka dalka ku amaanay shaqadii hufnayd ee ay soo qabteen.

Madaxweynaha Jubbaland ayaa madaxweynaha cusub ee dalka Xasan Sheekh Maxamuud Alle uga baryay inuu la garab galo shaqada culus ee hortaala isagoo dhamaan shacabka Soomaaliyeed ugu baaqay inay dowlada cusub garab istaagan si shaqooyinka horyaala ay u fuliso iyadoo haysta kalsoonida shacabka Soomaaliyeed.

Madaxweyne Axmed Madoobe oo hadalkiisa sii wata ayaa sheegay in sanadahii lasoo dhaafay Jubaland ay dhibaato culus kasoo gaartay khilaafaad ay abuurtay dowlada Federaalka oo ka jiray gobolka Gedo ayuu sheegay in la xalin doono wax walba oo caqabado ah oo jiray islamarkaana caqabadaha gobolkaas ka jiray ay ahayeen kuwo dano gaar ah laga lahaa balse aan qusayn bulshada deegaankaas.

Wuxuu tilmaamay in maanta laga bilaabo la fasaxay dhamaan tageeradii iyo adeegyadii hormarinta ee gobolka ka xayirnaa sanadahii lasoo dhaafay ee heer Federaal iyo heer Jubbaland, isagoo intaas ku daray in dhismaha golayaasha deegaanka laga bilaabi doono degmada Garbahareey ee Xarunta gobolka Gedo, hayeeshee aysan jirin maamul cusub oo gobolkaas loo magacaabayo dadka deegaankuna ay soo dooran doonan dadkii matalilahaa.

Gabagabadii Madaxweynaha Jubbaland Axmed Maxamed Islaam wuxuu sheegay in kala aragti duwanaantii iyo khilaafkii dowlada Federaalka ah ay gobolkaas ka abuurtay aan cidna loo beegsan doonin dadka deegaanka iyo guud ahaan shacabka Jubbaland ay u siman yihiin xuquuqaha ay xaqa u leeyahiin wax walbana wada hadal lagu dhamayn doono.