Gudomiye Cali Jeyte oo DiidaySida Loo Wajahayo Wejiga Labaad ee Dagaalka ka Dhanka ah Al-shabaab.

Guddoomiyaha maamulka gobolka Hiiraan Cali Jeyte Cismaan oo wareysi dheer siiyay laanta afka Soomaaliga ee VOA-da ayaa si adag uga soo horjeestay hanaanka madaxda dowladda u wajahayaan wajiga labaad ee howlgalka ka dhanka ah kooxda Al-shabaab.

Wuxuu sheegay inuusan ku qanacsanen hanaanka madaxda dowladda Soomaaliya ay u wajahayaan wajiga labaad ee howlgalada ka dhanka ah Shabaab oo uu tilmaamay in dowladda ay hoos u dhigtay doorka dadka deegaanka ay ku lahayeen dagaalka ka dhanka Ururka Al-shabaab.

 

“Waxay u baahan tahay aragti qaran aniga masii wadi karo dagaalka, mar haddii xaduuda Hiiraan laga gudbo ka masuul ahaan ima quseyso, aragtida aan qabo dagaalkan markii hore kuma bilaaban aragti qaran ee si lama filaan ah ayuu ku bilowday wuuna ku guuleystay, aniga halkaas ayaa uga haray, malaha foormalo ka fiican ayay dowladda hayaane, kaas ayaa ka sugayna iyo waxii kasoo baxo,” ayuu yiri guddoomiye Cali Jeyte Cismaan

Guddoomiye Cali Jeyte ayaa sidoo kale xusay in qaabka kaliya ee looga adkaan karo dagaalka ka dhanka Shabaab iney tahay kacdoonka shacabka, islamarkaana aanan loo baahneen in madaxda dowladda Fedaraalka iney ka weecdaan formalaha uu lahaa wajigii koobaad ee howlgalkii guuleystay.

“Dagaalka aan hadda galnay waxa uu ahaa kacdoon bulsho oo dowlada caawinayo, waxaa moodaa in laga leexday foormaladii dagaalka, sida kaliya oo lagu guuleysan karo dagaalka waxay tahay in la helo kacdoon bulsho aniga aragtida aan qabo ee aan soo fulinay” ayuu yiri guddoomiyaha gobolka Hiiraan Cali Jeyte Cismaan.

Hadalkaan kasoo yeeray guddoomiye Jeyte ayaa imaanaya, iyadoo dowladda Fedaraalka ay horay u shaacisay inuu bilaabanayo wajiga labaad ee dagaalka ka dhanka ah Shabaab, kaasoo ay ka qeyb qaadanayaan ciidamo ka socda dowladaha safka hore.