Maxkamada ciidamada ee dowladda federaalka ayaa dil ku xukuntay Dable Cabdullaahi Xasan Maxamed Cali oo loo heystay dilka wada gaari dad-weyne oo marayay inta u dhaxeysa Muqdisho iyo Afgooye gaar ahaan Siinka Dheer iyo dhaawaca qof rayid ah oo kamid ah rakaabka gaariga, dilkaas oo dhacay 06-01-2019.
Marxuumka la dilay ayaa lagu magacaabi Maxamed Ismaaciil Qaboobe, sidoo kale dhaawac culus oo qeyb ka mid ah jirkiisa uu dareen seegay ayaa gaaray Maxamed Cali Xasan oo kamid ahaa rakaabka gaariga darawalkiisa geeriyooday.
Xafiiska Xeer Ilaalinta Ciidamada Qalabka Sida ayaa ku soo oogay edeysanaha uu toogtay wadaha gaariga si jees-jees ah,
” Eedaysanuhu si jees jees ah ayuu u toogtay marxuunka, xilliga uu dilka geysanayay ma uusan siin tix gelin gaar ah siin wadaha gaariga ee u istaagay si uu u aqbalo hubinta sharciga ee siinka dheer oo uu mari jiray badi waddadaas” Sidaas waxaa yiri Laba Xidigle Ismaaciil Salaad Maxamed
22-kii bishan ayaa loo fariistay dhageysiga eedda ka dhanka ah eedeysane Cabdullaahi Xasan Maxamed Cali, waxaana ay xafiiska Xeer Ilaalinta Maxkamadda horkeeneen Qiraalka Eedeysanha, dhibane kamid ah rakaabkii gaariga saarnaa oo qeyb badan oo jirkiisa kamid ah dareen seegay dhaawici gaaray dartiis, sawirka Marxuumka, warqadda dhaawac muujinta dhakhtarka.
Qareenada u dooday eedeysanaha ayaa dhinacooda ku dooday in loo naxariisto loona fududeeyo maadaama uu iskiisa u qaatay waajibaad aan loo dirsan taasi oo ay ka dhalatay dhimashada wada gaari iyo dhaawaca rakaab kamid ah dadyowgii saarnaa gaariga.
Dhagaysiga dacwada ka dib, Maxkamadda ciidamada waxay dil ku xkuntay Eedeysane Cabdullaahi Xasan Maxamed Cali dil toogasha ah oo ah qisaasta Marxuum Maxamed Ismaaciil Qaboobe, sida uu u sheegay Warbaahinta Gaashaanle Dhexe Maxamuud Xuseen Maxamed oo kamid ah Garsoorayaasha Maxkamadda darajada koowaad ee Ciidamada Qalabka Sida.
Eedeysanaha ayaa heysta fursad kale oo uu ku dalban karo Rafcaan hadii uusan ku qancin Xukunka Maxkamadda darajada Koowaad Ee Ciidamada Qalabaka Sida
Magaalada Muqdisho waxaa bilowgii bishan ka dhacay muharaad ballaaran oo lagaga cabanayay dilka dirawal bajaajle ah, kaasi oo uu dilay askari ka tirsan ciidamada amniga magaaladda.
