Garsooraha Soomaaliyeed Omar Abdulkadir Artan ayaa bog cusub ka furaya taariikhda kubadda cagta Soomaaliya iyo Afrika, kaddib markii loo magacaabay inuu dhex-dhexaadiyo kulanka UEFA Super Cup 2026, oo ay isku wajahayaan Paris Saint-Germain iyo Aston Villa.
34 jirkan Soomaaliyeed ayaa noqonaya garsoorihii ugu horreeyay ee aan Yurub ka soo jeedin ee hoggaamiya UEFA Super Cup, iyadoo magacaabistiisa ay ka tarjumayso horumarka uu sameeyay garsoorka Afrika iyo xiriirka sii xoogeysanaya ee UEFA iyo CAF.
Artan ayaa 18-kii bilood ee lasoo dhaafay sameeyay tallaabooyin dhowr ah oo taariikhi ah. Wuxuu noqday Soomaaligii ugu horreeyay ee garsoora finalka CAF Champions League, waxaana markii dambe lagu abaalmariyay Garsooraha Ragga Afrika ee Sanadka 2025, ka hor inta aan loo xulan garsoorayaasha Koobka Adduunka 2026.
Safar ka soo bilaabmay Soomaaliya
Sheekada Artan ayaa ka soo bilaabatay ciyaaraha yaryar ee xaafadaha, ka hor inta uusan u gudbin ciyaaraha iskuullada iyo horyaalka Soomaaliya.
Wuxuu sheegay inuu yaraantiisii la kulmay duruufo adag, gaar ahaan kaddib geeridii aabbihii iyo kala maqnaanshihii hooyadii, balse xaaladahaas aysan ka hor istaagin inuu raaco riyadiisa.
Sannadkii 2018 ayuu ku biiray liiska garsoorayaasha caalamiga ah ee FIFA, halka 2024 uu noqday garsoorihii ugu horreeyay ee Soomaali ah ee garsoora Koobka Qaramada Afrika.
Artan ayaa sheegay in magacaabistiisa UEFA Super Cup ay farxad weyn u ahayd isaga iyo qoyskiisa, isagoo xusay taageerada ballaaran ee uu ka helay Soomaalida ku nool Yurub iyo Austria.
Wuxuu sheegay in ciyaartan ay u noqon doonto kulankiisii ugu horreeyay ee uu ka garsooro Yurub, isagoo sidoo kale tilmaamay inuu si gaar ah ugu diyaar garoobayo kulanka, oo ay ku jirto daraasaynta qaabka ciyaarta, xeeladaha iyo hab-dhaqanka labada kooxood.
Farriinta uu u diray dhalinyarada doonaysa inay garsoorayaal noqdaan ayaa ahayd in aysan waligood ka quusan riyadooda, ayna maalin kasta bartaan wax cusub, xirfaddoodana horumariyaan.
“Ha joojin riyada,” ayuu ku boorriyay.
Kulanka waxaa Artan ka caawin doona Liban Abdoulrazack Ahmed oo ka socda Jabuuti iyo Stephen Eleazar Onyango Yiembe oo Kenya ah, halka garsooraha afraad uu yahay Rade Obrenovič oo Slovenia ah. VAR-ka waxaa loo magacaabay Marco Di Bello oo Talyaani ah, halka kaaliyaha VAR uu yahay Guillermo Cuadra Fernandez oo Isbaanish ah.
Kulanka UEFA Super Cup 2026 ayaa dhexmaraya Paris Saint-Germain, oo ku guuleysatay Champions League, iyo Aston Villa, oo ku guuleysatay Europa League, waxaana lagu ciyaari doonaa Salzburg.
