Wasiir ku xigeenka Gaashaandhigga Ruushka Vasily Osmakov ayaa magaalada Moscow kulan kula yeeshay Wasiiru Dowlaha Wasaaradda Gaashaandhigga Soomaaliya Cumar Cali Cabdi, iyadoo labada dhinac ay ka wada hadleen suurtagalnimada iskaashi dhinaca milatariga iyo amniga ah oo dhexmara labada dal, sida lagu sheegay war kasoo baxay Wasaaradda Difaaca Ruushka.
Qoraalka wasaaradda ayaa lagu sheegay in wada hadalladu diiradda lagu saaray qodobo muhiim u ah iskaashiga difaaca ee labada dhinac, iyadoo labada mas’uul ay muujiyeen sida ay uga go’an tahay horumarinta wadahadal wax ku ool ah iyo xoojinta xiriirka milatari si tartiib tartiib ah.
Kulanka ayaa sidoo kale looga hadlay barnaamijyada tababarka ciidamada, iskaashiga la dagaallanka argagixisada iyo wada shaqeyn farsamo oo la xiriirta dhinacyada milatariga.
Sawirro ay baahiyeen warbaahinta Ruushka ayaa muujinayay saraakiil ka kala socotay labada dal oo wada hadallo rasmi ah ku yeeshay mid kamid ah xarumaha Wasaaradda Difaaca Ruushka ee Moscow.
Horaantii bishan May, Safiirka Ruushka ee Soomaaliya Mikhail Golovanov ayaa sidoo kale kulan kula yeeshay Muqdisho Madaxweynaha Soomaaliya Xasan Sheekh Maxamuud, kaas oo xaqiijiyay ka qeybgalka shir-madaxeedka saddexaad ee Ruushka iyo Afrika oo lagu wado inuu qabsoomo bisha Oktoobar 2026.
