Wasiirrada Ganacsiga ee dalalka ku mideysan Hindisaha Geeska Afrika (HoAI) ayaa saxiixay Baaq Wasiirro oo Wadajir ah, kaas oo lagu dhisay Guddiga Fududeynta Ganacsiga Gobolka ee Geeska Afrika (RTFC).
Heshiiskan ayaa lagu soo gabagabeeyey shirkii ugu horreeyey ee Wasiirrada Ganacsiga ee Hindisaha Geeska Afrika, kaas oo ay guddoominaysay Soomaaliya, waxaana shirku diiradda lagu saaray xoojinta ganacsiga iyo isku-xirka dhaqaale ee dalalka gobolka.
Shirka ayaa lagu gaaray saddex qodob oo muhiim ah sida in la ansixiyey Qorshe-hawleedka Fududeynta Ganacsiga Gobolka 2026–2031, oo ay ku jiraan shan tallaabo oo mudnaan degdeg ah leh, Waxaa si rasmi ah loo dhisay Guddiga Fududeynta Ganacsiga Gobolka (RTFC), kaddib saxiixa Baaqa Wadajirka ah, iyo in la isku raacay qorshe hawleed 45 maalmood ah, kaas oo lagu hawlgelinayo guddiga, laguna diyaarinayo kulankiisa ugu horreeya.
Guddiga cusub ayaa la filayaa inuu isku xiro guddiyada qaran ee fududeynta ganacsiga ee dalalka xubnaha ka ah hindisaha, isla markaana uu ka shaqeeyo dardargelinta ganacsiga xuduudaha, is-weydaarsiga khibradaha iyo hirgelinta dib-u-habeynno ganacsi oo heer gobol ah.
Guddiga ayaa sidoo kale diiradda saari doona wax ka qabashada caqabadaha aan canshuuraha ahayn ee hortaagan isu-socodka badeecadaha iyo ganacsiga dalalka Geeska Afrika.
Dalalka xubnaha ka ah Hindisaha Geeska Afrika ayaa lagu wadaa inay wakiilladooda u soo magacaabaan guddiga ugu dambayn 30-ka Sebteembar 2026, halka kulanka ugu horreeya ee guddiga la qaban doono 45-ka maalmood ee lagu heshiiyey.
Guddoomiyaha shirka, Wasiirka Ganacsiga iyo Warshadaha Soomaaliya Amb. Jamaal Maxamed Xasan, ayaa sheegay in guusha heshiiskan aan lagu cabbiri doonin oo keliya bayaannada iyo heshiisyada la saxiixay, balse lagu qiimeyn doono saameynta uu ku yeesho ganacsatada iyo shacabka gobolka.
Wasiirku wuxuu tilmaamay in natiijada laga filayo ay ka mid yihiin habraacyo ganacsi oo fudud, waqti yar oo badeecadaha lagu sii daayo xuduudaha, isku-dubarid wanaagsan oo ka dhexeeya hay’adaha xuduudaha iyo hoos u dhaca kharashaadka ganacsiga.
“Waxaan maanta yeellannay jihada mideysan, hannaan hirgelineed iyo jadwal cad. Waxa hadda la inaga sugayaa waa in ballanqaadkan siyaasadeed aan u beddelno natiijooyin ay arki karaan ganacsatada iyo shacabka gobolka,” ayuu yiri Wasiir Jamaal Maxamed Xasan.
Baaqa wadajirka ah waxaa saxiixay wasiirrada ganacsiga ee Jabuuti, Itoobiya, Kenya, Soomaaliya iyo Koonfurta Suudaan, iyadoo ay goob-joog ka ahaayeen hay’adaha iyo saaxiibbada caalamiga ah ee taageera horumarinta gobolka.
Hindisaha ayaa ujeeddadiisu tahay in la xoojiyo iskaashiga dhaqaale ee dalalka Geeska Afrika, lana abuuro aag dhaqaale oo isku xiran, kaas oo ganacsiga gobolka ka dhiga mid fudud, ammaan ah oo loo dhan yahay.
