Guddoomiyaha guddiga madaxa banaan ee doorashooyinka Qaranka Cabdikariin Axmed Xasan ayaa shaaca ka qaaday in dhamaadka bishan Novembar ee sanadkan 2025 magaalada Muqdisho la qaban doono doorashada goleyaasha deegaanka ee degmooyinka gobolka Banaadir.
Guddoomiye Cabdikariin ayaa sheegay in shacabka Soomaaliyeed, gaar ahaan kuwa ku nool magaalada Muqdisho in looga baahan yahay u diyaar garowga sidii ay uga qeyb qaadan lahaayeen doorashada golayaasha deegaanka ee gobolka Banaadir.
“30 Bisha Novembar qof kasta oo ku nool Muqdisho waa inuu isku diyaarayaa sidii u codeyn lahaa doorashada qof iyo codka ah ee Golaha deegaanka, maadama ay soo idlaatay diwaan galinta dadweynaha 30-kii bishii lasoo dhaafay ee September” ayuu yiri Guddoomiyaha Guddiga Doorashooyinka Cabdikariin Axmed Xasan.
Guddoomiyaha guddiga ayaa sidoo kale xusay iney gobolka Banaadir ay iska diiwaan galiyeen dad ku dhaw hal Milyan oo ruux, islamarkaana haatan howlaha diiwaan galinta laga bilaabay degmooyinka Laascaanood iyo Xudur oo ka kala tirsan maamulada SSC Khaatumo iyo Koonfur Galbeed Soomaaliya.
“Geediga diiwaan gelinta doorashooyinka dalka waxay marayaan meel wanaagsan oo waxaan soo gabagabeynay diiwaan gelinta degmooyinka gobolka Banaadir, waxaana haatan loo gudbay dhanka gobolada kale ee dalka Laascaanood iyo Xudur ayay hadda ka bilawdeen, waxaana sidoo kale la doonaya in dhamaan degmooyinka kale ee gobolada dhexe laga bilaabo, Muqdisho waxaan ka diiwaan galinay dad ku dhaw hal Milyan oo ruux” ayuu yiri guddoomiyaha guddiga doorashooyinka Cabdikariin Axmed.
Ugu dambeyntii guddoomiyaha guddiga ayaa ugu baaqay Ururada iney soo dhameystiraan sharuudaha sharci ahaan shiyahooda iyo sumadahooda, wuxuuna sidoo kale ugu baaqay shacabka is diiwaan galiyay iney isku diyaariyaan kala xulashada ururada is diiwaan geliyay.
