Soomaaliya oo Bankiga Adduunku u Qirey in ay ku Dhawdahey Heerkii Deyn Cafinta.

Bankiga adduunka ayaa Dowladda Soomaaliya ku bogaadiyay inay gaartay horumarro si dalka uu u noqdo mid u qalma in si buuxda looga cafiyo deymaha iyadoo la raacayo Hindisaha waddamada deymaha badan lagu leeyahay (HIPC).

Dhowrka bilood ee soo socda ayuu Bankiga Adduunka sheegay in ay si dhow ula shaqeyn doonaan dowladda iyo Hay’adda Lacagta Adduunka (IMF), si ay Soomaaliya uga taageeraan sidii ay u gaari lahayd heerka HIPC ee dhameystirka hannaanka dayn cafinta.

Bankiga adduunku wuxuu sheegay dayn cafintu in ay noqon doonto mid muhiim u ah Muqdisho oo gacan ka geysan doonta. in dalka loo furo fursado cusub oo maaliyadeed.

“Waxaan soo wada marnay waddo dheer, waxaana la gaaray natiijooyin horumarineed oo muhiim ah,” ayuu yiri Keith Hansen, oo ah agaasimaha Bankiga Adduunka ee Soomaaliya, Kenya, Rwanda iyo Uganda, oo hadal ka jeediyay kulan ka dhacay magaalada Muqdisho ee caasimadda Soomaaliya.

Keith Hansen ayaa sheegay in dowladda Soomaaliya iyo Bangiga Adduunkaba looga baahan yahay inay sii wadaan wadashaqeynta si loo xaqiijiyo in si degdeg ah loo fuliyo dayn cafinta.

Hadalkan ayaa yimid kadib markii wasaaradda maaliyadda ay marti galisay shirka dib u eegista waxqabadka shaqo ee dalka oo socday muddo labo maalmood ah iyadoo wadahadallo miro dhal ah ay yeesheen Bangiga iyo madaxda dowladda iyo dowladaha xubnaha ka ah federaalka oo ay ku jiraan qeybaha fulinta mashaariicda.

Sida laga soo xigtay Bangiga Adduunka, kulanka ayaa ku soo aaday waqti munaasib ah iyadoo dalka uu u dhaqaaqay dhanka dhameystirka dayn cafinta.