Wakaalada wararka soomaaliyeed warsom.com
Qarax ayaa waxaa lala beegsaday Ciidamadda Dowladda Kenya ee Gobolka Waqooyi Bari ee Kenya, waxaana qaraxaasi ka dhashay khasaarooyin dhimasho iyo dhaawacba leh oo soo gaaray Ciidamadda Kenya.
Ciidamadda Dowladda Kenya ee Ilaalada Xerada Qaxootiga ee Ifo ee dalka Kenya, ayaa waxaa lala eegtay qarax khasaarooyin kala duwan ay ka dhasheen, isla-markaana qaraxaan ayaa waxaa lala eegtay xilli ay ka soo degayeen gaari ay saarnaayeen.
Taliyaha Ciidamadda Ammaanka/Booliska ee Gobolka Waqooyi Bari ee Kenya Leo Nyongesa, oo goor dhaw Saxaafadda u qabtay Shir Jaraa’id, ayaa wuxa uu qiray in qaraxaani uu dhacay.
“Qarax bambaano ayaa waxaa lala eegtay Ciidamadda Dowladda Kenya ee Ilaalada Xeryaha Qaxootiga, waxaana qaraxaasi lala eegtay iyagoo ka soo dagaaya gaarigii ay saarnaayeen” ayuu yiri Taliye Leo Nyongesa
“Waxaa qaraxaan inooga dhintay hal askari, seddex kalana way inaga dhaawacmeyn, kuwii dhaawacmayna hadda waxaa laga daaweynaayaa dhaawacyadii soo gaaray” ayuu sii raaciyay Leo Nyongesa.
Sidoo kale qaraxaan ayaa wuxuu dusha u saariyay Xarakada mujaahidiinta Al Shabaab, oo iyadu horey ugu hanjabtay in qaraxyo waaweyn ay kaga aar-gudan doonto Dowladda Kenya, maadaama ay ciidamadeeda soo gellisay gudaha dalka Somaliya, si’ay ula dagaalamaan xarakada Al Shabaab.
Majirto wax war ah oo ka soo baxay dhinaca Xarakada mujaahidiinta Al Shabaab, oo ku aadan qaraxa khasaaraha dhimashada iyo dhaawaca ka soo gaaray Ciidamadda Dowladda Kenya, oo ay kula jiraan dagaalo xoogan.