Wararka Caalamka – WARSOM.COM – Wararka Soomaaliya,warka soomaaliya,Somalia News

Eedeymo la Xiriira Faragelin Siyaasadeed uu ku Hayo Soomaaliya oo Dawladda Turkigu Beenisay.

Warsom — Wed, 13 May 2026 17:25:49 +0000

Dowladda Turkiga ayaa si adag u beenisay eedeymo lagu faafiyay baraha bulshada oo sheegaya in Ankara ay faragelin ku heyso arrimaha gudaha Soomaaliya isla markaana cadaadis ku saareyso mucaaradka si ay u taageerto dhinac siyaasadeed gaar ah.

Bayaan kasoo baxay waaxda xiriirka iyo warfaafinta madaxtooyada Turkiga ayaa lagu sheegay in wararkaasi yihiin “kuwa aan waxba ka jirin” isla markaana loogu talagalay in lagu marin habaabiyo ra’yiga shacabka.

“Eedeymaha sheegaya in Turkigu uu faragelin ku hayo geeddi-socodka siyaasadeed ee Soomaaliya islamarkaana uu adeegsanayo awood milatari si uu cadaadis ugu saaro mucaaradka una taageero dhinac gaar ah waa kuwo gebi ahaanba been abuur ah,” ayaa lagu yiri bayaanka.

Dowladda Turkiga ayaa sheegtay in xiriirka kala dhaxeeya Soomaaliya uu muddo dheer ku dhisnaa iskaashi sharciyeysan oo waafaqsan qawaaniinta caalamiga ah, iyadoo ujeeddadu tahay xoojinta amniga, xasilloonida iyo hay’adaha dowladda Soomaaliya.

Bayaanka ayaa sidoo kale lagu xusay in ciidamada Turkiga ee ku sugan Soomaaliya ay diiradda saarayaan dib-u-dhiska iyo tababarka Ciidanka Xoogga Dalka Soomaaliyeed, casriyeynta hay’adaha ammaanka iyo xoojinta awoodda la dagaallanka kooxaha hubeysan.

“Ciidamada Turkiga wax lug ah kuma laha doorashooyinka Soomaaliya ama khilaafaadka siyaasadeed ee gudaha,” ayaa lagu yiri bayaanka, iyadoo Ankara ay sheegtay inay taageersan tahay sii socoshada hannaanka dimuqraadiyadeed iyo ixtiraamka rabitaanka shacabka Soomaaliyeed.

Turkiga ayaa sidoo kale ugu baaqay shacabka iyo warbaahinta in aan la rumeysan wararka ay ku tilmaantay dacaayadaha iyo xogaha marin habaabinta ah ee lagu dhaawacayo xiriirka qotoda dheer ee u dhaxeeya labada dal.

Madaxweynihii Hore ee Koofur Galbeed ahna Gudoomiyaha Ururka Horumar iyo Midnimo Qaran oo ka Digay Musuq maasuq Doorashada konfur galbeed.

Warsom — Wed, 13 May 2026 15:34:52 +0000

Madaxweynihii hore ee Dowlad Goboleedka Koonfur Galbeed Soomaaliya Shariif Hassan Sheikh Aden ayaa ka digay in la musuqmaasuqo doorashada ka dhacday deegaanada Koonfur Galbeed, isagoo ugu baaqay guddiga doorashada iyo dowladda inay si caddaalad iyo hufnaan leh u maareeyaan natiijada codbixinta.

Doorashada oo dhacday Axaddii lasoo dhaafay ayaa lagu waday in natiijadeeda lagu dhawaaqo 24 saac gudahood, balse ilaa iyo hadda ma jiro war rasmi ah oo kasoo baxay guddiga doorashooyinka, arrintaas oo sii kordhisay walaaca siyaasadeed iyo su’aalaha laga qabo hannaanka tirinta codadka.

Shariif Xasan oo taageerayaashiisa kula hadlayay magaalada Baydhaba ayaa sheegay in shacabka Koonfur Galbeed ay juhdi badan geliyeen diiwaangelinta iyo ka qeybgalka doorashada, ayna muhiim tahay in codkooda la ilaaliyo.

“Waxaan rabnaa in codadka shacabka aan la is daba marin. Haddii codka shacabka la beddelo ama la musuqmaasuqo, ma aqbali doono,” ayuu yiri Shariif Xasan.

Wuxuu sheegay in shacabka ay u istaageen safaf dhaadheer si ay isu diiwaangeliyaan una codeeyaan, taasoo uu ku tilmaamay tallaabo taariikhi ah oo muujinaysa rabitaanka dadka ee doorasho xor iyo xalaal ah.

“Dadka waxay galeen dadaal badan, waxay qaateen kaararka codbixinta, waxayna muujiyeen inay doonayaan hoggaan ay iyagu doortaan, Doorashadu waa jidka keliya ee lagu gaari karo horumar iyo hoggaan lagu kalsoon yahay,” ayuu yiri.

Shariif Xasan ayaa sidoo kale sheegay in inkastoo ay jiraan warar sheegaya in natiijada la og yahay, haddana shacabka ay sugayaan oo keliya ku dhawaaqista rasmiga ah ee guddiga doorashada.

“Dadka way ogyihiin sida codadku u kala baxeen, laakiin waxaan rabnaa in guddigu si rasmi ah oo daahfuran ugu dhawaaqo natiijada,” ayuu hadalkiisa ku daray.

Wuxuu uga mahadceliyay shacabka reer Koonfur Galbeed, ciidamada ammaanka, dhalinyarada iyo hawlwadeennada doorashada kaalintii ay ka qaateen sugidda amniga iyo qabsoomidda codbixinta.

Markab Laga Leeyahay Dalka Masar Laguna Afduubtay Xeebaha Soomaaliya oo Dalalka Khaliijku Cambaareeyeen.

Warsom — Wed, 13 May 2026 14:27:14 +0000

Wadamada Imaaraadka Carabta, Qatar iyo Boqortooyada Urdun ayaa si adag u cambaareeyay dhacdo lagu afduubtay markab shidaal oo ka yimid biyaha caalamiga ah ee Yemen, kaas oo sida la sheegay ay la socdeen badmaaxiin u dhashay dalka Masar, kadibna loo jiheeyay biyaha Soomaaliya.

Saddexda dal ayaa bayaan ay soo saareen Wasaaradahooda Arrimaha Dibadda ku sheegay in dhacdadani ay tahay mid si cad u jebinaysa sharciga caalamiga ah, isla markaana khatar weyn ku ah amniga marinada badda iyo isu socodka ganacsiga caalamiga ah.

Waxay sidoo kale muujiyeen taageero buuxda oo ay u hayaan Dowladda Masar iyo qoysaska badmaaxiinta la afduubtay, iyagoo adkeeyay muhiimadda ay leedahay in si degdeg ah loo xaqiijiyo ammaankooda loona sii daayo.

Dhanka kale, waxay ku baaqeen in la xoojiyo dadaallada caalamiga ah ee lagula dagaallamayo burcad-badeednimada iyo dambiyada abaabulan ee ka dhaca marinada badda ee istiraatiijiga ah.

Wasaaradda Arrimaha Dibadda ee Masar ayaa horay u sheegtay inay si dhow ula socoto xaaladda markabka M/T Eureka, oo laga soo afduubtay biyaha Yemen laguna haayo xeebaha Soomaaliya.

Sidoo kale, Wasiirka Arrimaha Dibadda Masar, Dr. Badr Abdel Aaty, ayaa faray safaaradda Masar ee Muqdisho inay si dhow ula socoto xaaladda sideedda badmaax ee Masar u dhashay, isla markaana ay bixiso dhammaan taageerada iyo dadaallada lagu xaqiijinayo sii deyntooda, iyadoo lala xiriirayo mas’uuliyiinta Soomaaliya si loo xaqiijiyo badqabka shaqaalaha markabka.

Mucaaradka Muqdisho oo ku Dhawaaqay Markale Mudaharaad 16 ka May Ka Dhaca Caasimada Dalka.

Warsom — Mon, 11 May 2026 19:47:23 +0000

Madasha samata-bixinta ayaa ku dhawaaqday bannaanbax kale oo Muqdisho ka dhicidoona 16-ka may kaddib ay dowladda federaalka ku eedeeyeen in ay hor istaagtay bannaanbaxii mucaaradku qorsheeyeen inuu shalay ka qabsoomo magaalada Muqdisho, kaas oo ay sheegeen in loogu hiilinayay dad laga barakiciyey guryahooda.

Madasha waxay sheegeen inay inay sii wadi doonto waxa ay ku tilmaantay “halgan nabadeed” oo ka dhan ah barakicinta khasabka ah iyo ku takrifalka awoodda dowladda,

Bayaan ay madashu soo saartay ayaa lagu sheegay in bannaanbaxii shalay uu uu ahaa mid waafaqsan dastuurka, isla markaana si rasmi ah loogu wargeliyey hay’adaha ammaanka goobta iyo waqtiga uu dhacayo si loo sugo amniga iyo isu socodka dadka ka qaybgelaya.

Madashu waxay sheegtay in dowladda markii hore ku adkaysatay in dibadbaxa lagu qabto garoonka Eng. Yariisow ee Ex-Konis, balse hoggaanka mucaaradka ay aqbaleen arrintaas si looga fogaado xiisad amni.

Si kastaba, bayaanka ayaa lagu sheegay in magaalada lagu soo daadgureeyey ciidamo ka tirsan militariga, booliska iyo hay’adaha sirdoonka, iyadoo la xiray waddooyin muhiim ah isla markaana la xaddiday isu socodka dadweynaha iyo gaadiidka.

Madashu waxay sidoo kale ku eedeysay ciidamada ammaanka inay rasaas nool ku fureen dad dibadbaxayey oo ku sugnaa degmada Dayniile. Sida lagu sheegay bayaanka, hal qof ayaa ku dhintay rasaasta halka laba kale ay ku dhaawacmeen.

Waxay tacsi u dirtay qoyska qofka dhintay, iyadoo ugu baaqday dowladda in baaritaan madax bannaan lagu sameeyo dhacdadaasi isla markaana cadaaladda la horkeeno cid kasta oo ku lug leh.

Madashu waxay sheegtay in tallaabooyinka amni ee la qaaday ay si weyn u saameeyeen noloshii caadiga ahayd ee Muqdisho, oo ay ku jiraan isku socodka, waxbarashada, ganacsiga iyo adeegyada kale ee bulshada.

Waxay sidoo kale ku baaqday in la sii daayo dhalinyaro iyo dad kale oo loo xiray ka qaybgalka bannaanbaxyada, lana joojiyo waxa ay ku tilmaantay cabsi gelinta lagu hayo siyaasiyiinta mucaaradka, suxufiyiinta iyo dadka u ololeeya xuquuqda bulshada.

Madaxweynaha Soomaaliya Xasan Sheekh oo u Safray Dalka Uganda si uu uga Qeyb galo Caleema Saarka Madaxweyne Museveni.

Warsom — Mon, 11 May 2026 19:30:41 +0000

Madaxweynaha Soomaaliya Xasan Sheekh Maxamuud ayaa gaaray magaalada Kampala ee dalka Uganda, halkaas oo uu kaga qayb galayo xafladda caleemo-saarka Madaxweynaha Uganda Yoweri Kaguta Museveni oo dhici doonta Talaadada, laguna qabanayo Kololo Ceremonial Grounds.

Safarka Madaxweynaha Soomaaliya ayaa qeyb ka ah imaatinka hoggaamiyeyaal badan oo Afrikaan ah oo isugu yimid Kampala, kuwaas oo ay ka mid yihiin Madaxweynaha Jamhuuriyadda Dimuqraadiga Congo Félix Tshisekedi iyo Madaxweynaha Koonfurta Suudaan Salva Kiir Mayardit, kuwaas oo hore u gaaray magaalada..

Sidoo kale, madax kale oo heer gobol ah ayaa ka qayb galaya xafladda, oo ay ku jirto Ra’iisul Wasaaraha Rwanda Édouard Ngirente, oo metelaysa Madaxweyne Paul Kagame.

Dowladda Uganda ayaa sheegtay in ka qaybgalka hoggaamiyeyaashan uu muujinayo xiriirka diblomaasiyadeed ee sii xoogeysanaya iyo iskaashiga gobolka, gaar ahaan dhinacyada amniga, ganacsiga iyo xasilloonida Geeska iyo Bariga Afrika.

Madaxweyne Xasan Sheekh Maxamuud ayaa safarkiisa ku yimid xilli Soomaaliya ay si dhow ula shaqeyso Uganda, gaar ahaan howlgalka nabad ilaalinta Midowga Afrika ee Soomaaliya halkaas oo ciidamada Uganda ay door weyn ka qaateen dagaalka ka dhanka ah Al-Shabaab muddo ku dhow labaatan sano.

Xafladda caleemo-saarka ayaa la filayaa in ay noqoto mid ka mid ah isu imaatinnada diblomaasiyadeed ee ugu waaweyn gobolka sanadkan, iyadoo Kampala laga dareemayo feejignaan amni oo sare leh, gaar ahaan garoonka Entebbe, Kololo iyo hoteellada martida lagu qaabilayo.

Hawlgal ka Billowday Dalka Liibiya Loogana Horjeedo Dadka Shari darada ah oo Muwaadiniin Soomaali ah Lagu Xirxiray.

Warsom — Mon, 11 May 2026 18:14:38 +0000

Wararka ka imanaya caasimadda Tripoli ee dalka Libya ayaa sheegaya in ciidamada ammaanka iyo kooxo hubeysan ay tan iyo maalintii Jimcaha qabqabteen in ka badan 600 oo muhaajiriin ah, kadib howlgal ballaaran oo laga sameeyay xaafado kala duwan oo magaalada ah.

Dadka la qabtay waxaa ku jira Soomaali tiro badan. Warsame Cabdi Maxamed oo kamid ah Soomaalida ku nool Tripoli ayaa sheegay in in ka badan 300 oo Soomaali ah oo ay ku jiraan rag, haween iyo dad da’yo kala duwan leh lagu qabtay howlgalka.

Ilo wareedypo ayaa sheegaya in boolis iyo rag hubeysan ay baaritaanno ka sameeyeen xaafado badan, iyagoo dadka qaar kasoo qabtay guryahooda, halka kuwo kale laga qabtay waddooyinka, suuqyada iyo gaadiidka dadweynaha.

Muhaajiriin badan ayaa la sheegay in lagu qabtay xilli ay marayeen goobaha ganacsiga ama ay saarnaayeen gaadiidka dadweynaha, halka qaar kalena laga watay guryihii ay deganaayeen.

Howlgalkan ayaa cabsi weyn ku abuuray Soomaalida ku nool Tripoli, iyadoo dad badan ay sheegeen in aysan hadda dareemayn amni ay si xor ah ugu dhex socdaan magaalada.

Maamulka Libya wali si rasmi ah uma shaacin sababta ka dambeysa howlgalka. Si kastaba, dadka la qabtay ayaa la sheegay in wax laga weydiinayay sharciyadooda iyo dukumentiyada deganaanshaha.

Goobjoogayaal ayaa sheegay in dadka aan haysan waraaqaha rasmiga ah la xiray, mararka qaarna lala wareegay gaadiidkii ay saarnaayeen. Ilaa hadda lama oga goobaha loo qaaday dadka la qabtay, waxaana qoysas badan ay sheegeen inay waayeen xog ku saabsan ehelkooda.

Soomaalida ku nool magaalada ayaa sheegay in jahwareer iyo walaac sii kordhaya uu ka dhashay howlgalka, kadib markii xiriirka lala waayay dad badan oo la qabtay.

Madaxweyne Xasan Sheekh oo Ku eedeeyey kuwa ka Soo Horjeeda in ay Fashiliyeen Wada hadaladii Loo Balamay ayna aadeen Waddooyin kale.

Warsom — Sun, 10 May 2026 20:21:43 +0000

Madaxweynaha Soomaaliya, Xasan Sheekh Maxamuud, ayaa sheegay in ay su’aal ka taagan tahay sababta ay hoggaamiyeyaasha mucaaradku bannaanbaxooda ugu asteeyeen isla maalintii ay ka dhacaysay doorashada qof iyo cod ee Dowlad Goboleedka Koonfur Galbeed, hadal uu kaga dhawaajiyay khudbad uu kaga hadlay xaaladda guud ee dalka.

Madaxweynaha ayaa hambalyo u diray shacabka Koonfur Galbeed oo uu sheegay inay si nabad ah uga qeyb qaateen doorashooyinka qof iyo cod ee saaka ka dhacay deegaannada maamulkaasi, isagoo ku tilmaamay tallaabo muhiim ah oo lagu xaqiijinayo in awoodda dib loogu celiyo shacabka.

Waxa uu sheegay in dowladda Federaalka ay ka go’an tahay hirgelinta doorasho qof iyo cod ah oo dalka oo dhan ka dhacda, si shacabka Soomaaliyeed ay si toos ah ugu doortaan hoggaankooda.

Dhanka kale, Madaxweyne Xasan Sheekh ayaa mucaaradka ugu baaqay inay keenaan aragtiyo siyaasadeed iyo barnaamijyo wax ku ool ah oo lagu maareyn karo xaaladda dalka, halkii ay, sida uu yiri, “dareenka shacabka ka ganacsan lahaayeen.”

Madaxweynaha ayaa sidoo kale sheegay in mucaaradku fashiliyeen gogoshii wadatashiga ahayd ee dowladda u fidisay siyaasiyiinta si looga wada hadlo khilaafaadka jira iyo arrimaha doorashooyinka, isagoo xusay in bannaanbaxa maanta lagu soo beegay maalintii loo asteeyay wadahadalka ayna uga dan lahaayeen sidii wada hadalada loo Fashin lahaa iyagoo ka Doorbiday Waddooyin kale.

Intaas waxaa uu ku daray in dowladda ay ka hortagtay xaalado amni kaddib markii, sida uu sheegay, mucaaradku lasoo baxeen hub culus intii ay socdeen dhaq-dhaqaaqyada bannaanbaxa.

“Bannaanbax waa la qaban karaa, codkana waa la cabbiri karaa, waana xuquuq dastuuri ah, balse looma baahna bannaanbax ay ku soo dhuuntaan bahalo,” ayuu yiri Madaxweyne Xasan Sheekh.

Khudbadda Madaxweynaha ayaa ku soo aadaysa xilli magaalada Muqdisho ay ka taagan tahay xiisad siyaasadeed oo u dhaxeysa dowladda Federaalka iyo siyaasiyiinta mucaaradka, kuwaas oo isku haya hannaanka doorashooyinka iyo jihada siyaasadeed ee dalka.

Mucaaradka Diidan Siyaasadda Dawladda oo Ogolaaday in ay Ku Banaan Baxaan Goobaha Loo Asteeyey

Warsom — Sun, 10 May 2026 19:46:00 +0000

Mucaaradka Soomaaliya ayaa sheegay in bannaanbax ballaaran oo lagu waday inuu ka dhaco xaafado kala duwan oo Muqdisho ah loo raray Garoonka Eng yariisow, kadib markii la xiray waddooyin muhiim ah oo ku yaalla caasimadda oo ay ciidamo badan ay kusoo daadisay Dowladda Federaalka.

Madaxweynihii hore ee Soomaaliya Sheekh Shariif Sheekh Axmed oo la hadlay warbaahinta gudaha ayaa si rasmi ah ugu dhawaaqay in bannaanbaxa lagu qaban doono Garoonka Eng yariisow, isagoo shacabka ugu baaqay inay isugu yimaadaan halkaas abbaaro 11-ka duhurnimo.

Sheekh Shariif ayaa sheegay in bannaanbaxu uu yahay mid looga soo horjeedo barakicinta iyo burburinta lagu hayo qaar ka mid ah dadka ku nool Muqdisho, isagoo dadka ku boorriyay inay si nabad ah uga qeyb qaataan isu-soo-baxa.

Mucaaradka ayaa horey u qorsheeyay in banaanbaxooda uu ka dhacay meelo kala duwan oo kamid ah Magaalada Muqdisho, waxaana ay ugu dambeyntii aqbaleen soo jeedintii Wasaaradda amniga iyo Maamulka Gobolka Banaadir ee ahaa in mucaaradka banaanbaxooda ku qabsadaan Garoonka Eng yariisow.

Dowladda ayaa ciidamo aad u hubeysan iyo gaadiid milatari geeysay qaybo ka mid ah magaalada, iyadoo la adkeeyay amniga ka hor isu-soo-baxa.

Mucaaradka ayaa dowladda ku eedeeyay inay isku dayeyso in ay hor istaagto bannaanbaxa, halka masuuliyiinta ammaankuna ay sheegeen in tallaabooyinkani yihiin kuwo lagu sugayo xasilloonida magaalada.

Ciidanka Booliska Gobolka Banaadir oo Amarro Cusub ku Soo Rogay Banaan baxayaasha Muqdisho.

Warsom — Sun, 10 May 2026 19:14:27 +0000

Ciidanka Booliiska Soomaaliyeed, gaar ahaan kuwa Gobolka Banaadir, ayaa soo saaray digniin adag oo ku socota shacabka ku nool caasimadda, iyagoo ka digay in aan la oggolaan doonin bannaanbaxyo hubeysan ama falal rabshado wata iyadoo maanta la qorsheenayay inay banaanbaxaan Mucaaradka.

War-saxaafadeedka booliiska ayaa lagu sheegay in kaliya la oggol yahay isu-soo-baxyo nabadeed oo waafaqsan sharciga dalka iyo nidaamka amniga, kuwaas oo loo asteeyay inay ka dhacaan Garoonka Eng. Yariisow.

Sidoo kale, hay’adaha ammaanka ayaa adkeeyay in si buuxda loo mamnuucay in lagu dhex qaato hub, ama in la sameeyo abaabul keeni kara qalqal amni iyo kicin bulsho.

Ciidamada ammaanka ayaa sheegay in ay qaadayaan tallaabo adag oo ka dhan ah cid kasta oo lagu helo falal sharci-darro ah ama ku lug lahaanshaha bannaanbaxyo hubeysan.

Ugu dambeyn, shacabka ayaa lagu boorriyay inay la shaqeeyaan hay’adaha ammaanka si loo ilaaliyo xasilloonida iyo nabadda caasimadda Muqdisho, iyadoo xaaladdu ay tahay mid si dhow loo kormeerayo.

Waxaa xusid mudan, in Shacabka Caasimadda ay saakay ku waabariisteen askar badan oo qeyba kala duwan leh oo lagu soo daadiyay xaafadaha degmooyinka Gobolka Banaadir iyo waddooyinka muhiimka ah xitaa meelaha qaar la diidayo in socod lagu maro.

Go’aan Cusub Fududeynaya Arrimaha Doorashooyinka Maamul Goboleedyada oo Gudiga Doorashadu Soo Saareen.

Warsom — Sat, 09 May 2026 19:39:24 +0000

Guddiga Madaxa Bannaan ee Doorashooyinka Qaranka iyo Soohdimaha ayaa soo saaray wareegto cusub oo si toos ah u saameynaysa habka codbixinta doorashooyinka ka socda Dowlad Goboleedka Koonfur Galbeed Soomaaliya.

Go’aankan ayaa yimid kadib wadatashiyo lala yeeshay ururrada siyaasadda iyo dib-u-habeyn lagu sameeyay diiwaangelinta codbixiyeyaasha qaar ka mid ah degmooyinka gobolka, taasoo saameysay jadwalkii hore ee howlaha doorashada sida lagu sheegay Bayaanka ay soo saareen.

Guddigu ayaa shaaciyay in codbixiyeyaasha si rasmi ah u diiwaangashan ay codkooda ku dhiiban karaan kaliya marka la helo laba shuruud oo kala ah, inuu qofka sito Kaarka codbixiyaha rasmiga ah Ama warqadda diiwaangelinta codbixiyaha

Guddiga ayaa sidoo kale warkoodi ku faray shaqaalaha goobaha codbixinta in ay si adag u xaqiijiyaan aqoonsiga codbixiyaha, In magaciisu ku jiro liiska kama dambaysta ah, Ka hortagga codbixin laba jeer ah, Isticmaalka khad aan tirmeyn, Diiwaangelinta dhacdo kasta oo musuq ama shaki ah Iyo u gudbinta degdegga ah ee warbixinaha Guddiga iyo hay’adaha amniga

Guddigu ayaa si cad waxa uu uga digay isku day kasta oo lagu carqaladeynayo hannaanka doorashada, sida Codbixin laba jeer ah, isticmaalka dukumiinti been abuur ah, ama in qof kale lagu codeeyo magaciisa, waxaana Guddiga wacad ku maray sida warkoodi ku xusan in Qof kasta oo ku lug yeesha falalkaas uu wajihi doono tallaabo sharci oo waafaqsan shuruucda doorashooyinka iyo xeerka ciqaabta Soomaaliya.

Guddigu ayaa ugu dambeeyntii ugu baaqay dhammaan ururrada siyaasadda in ay taageerayaashooda ku wacyigeliyaan ilaalinta sharciga iyo ka qaybgalka doorasho nabdoon oo hufan.