Dawladda Dalka Jabuuti oo Muuse Biixi ku Tilmaantey in uu Yahey Xaalad Abuur.

0
77

Jamhuuriyada Jabuuti ayaa markale iska fogaysay in ay martigalinayso jabhad ka dhan ah jiritaanka Somaliland.

Qoraal kasoo baxay Wasaarada Warfaafinta Jabuuti ayaa lagu sheegay in ay Jabuuti ku suntantahay wada noolaanshaha iyo ilaalinta waddamada ay jaarka la tahay.

“Siyaasada Jamhuuriyada Jabuuti waxay ku dhisantahay isxaqdhawr iyo wada noolaanshaha dowladaha iyo umadaha aanu jaarka nahay, Jabuuti waxay ka shaqaynaysa nabada iyo daganaanshaha gobolka Geeska Afrika” ayaa lagu yidhi qoraalka.

Jabuuti waxay nasiibdaro ku tilmaantay eedayntii Madaxweyne Biixi ee ahayd in ay martigalisay jabhad ka dhan ah jiritaanka Somaliland, waxayna sheegtay in hadalkaasi uu ahaa mid abuuraya xaalad aan loo baahnayn.

Qoraalku waxa uu intaa ku daray in shacabka reer Jabuuti iyo shacabka Somliland ay yihiin laba shacab oo daris wanaag iyo walaalnimo ka dhaxayso isla markaana anay Jabuuti ka suuroobin in ay ku kacdo fal wax u dhimanaya nabadgalyada Somaliland.

“Jabuuti waxay sii wadi doontaa siyaasadeeda ku suntan adkaynta nabada iyo wax wada qabsiga umadaha aan walaalahanahay” ayaa lagu yidhi qoraalka.

Marka laga yimaado iska fogaynta Jabuuti ee jiritaanka jabhada, Hoggaamiyayaasha Awdal State ayaa ku sugan Jabuuti, iyaga oo caasimada Jabuuti hadal hanjabaad ah uga soo diray Somaliland.