R/wasaare Maxamed Xuseen Rooble oo Ka Hadley Siyaasadda Soomaaliya Halka ay Mareyso.

0
253

Raysal wasaaraha Xukuumadda Fedaraalka Soomaaliya Maxamed Xuseen Rooble oo ka hadlaayay maanta munaasabad ay khudabadahooda Musharaxnimo kusoo bandhigayeen Musharaxiinta kuraasta Aqalka sare ee gobolada Waqooyi ee Soomaaliya ayaa ka hadlay arrimo badan oo quseeya xaalada dalka.

Raysal wasaare Rooble ayaa khudbadiisa in ta badan waxay quseeysay arrimaha doorashooyinka dalka oo uu aad ugu dheeraaday, isagoona maamul goboleedyada dalka faray in lasoo dhameytiro kuraasta Aqalka sare, islamarkaana si deg deg ah u  qabtaan doorashada kuraasta Golaha Shacabka Soomaaliya.

Shacabka Soomaaliyeed ayuu ugu baaqay Raysal wasaaraha iney ka qeyb qaataan howlaha amniga iyo xasiloonida dalka, kana fogaadaan wax walba oo keeni kara tuhun iyo qalqal amni.

“Xaaladda dalka maanta wuxuu marayaa meel fiican doorasho ayaan ku jirnaa, khilaafaad wey iska yimaadaan laakin wax weyn maahan, wax weyn yaan loo qaadanin wax walba waxaa ka muhiimsan xasilloonida iyo nabad galyada dalka” Ayuu yiri Raysal wasaare Rooble.

Raysal wasaaraha ayaa sidoo kale sheegay inaysan haatan jirin wax sida u weyn oo la isku haayo, waxuuna faray shacabka Soomaaliyeed iney wax ka dhowraan xasiloonida dalka oo aysan ka faa’ideysan Al-shabaab.

“Shacabka Soomaaliyeed waxaan farayaa inay ilaaliyaan xasiloonida Al-Shabaabna uusan ka faa’iidaysanin, ayna ka fogaadaan waxa tuhumada ama qalqalka abuurayo” ayuu yiri Rooble

Gabagabadii Raysal wasaaraha Soomaaliya waxuu markale goobta ka sheegay in kiiska Ikraan Tahliil kuwii ka dambeeyay in maanta ama beri ay gacanta shacabka soo gali doonaan, islamarkaana lala xisaabtami doono.

“Waxaan u taaganahay Cadaaladda kuwa dhibka u geystay Ikraan Tahlil ama maanta aan helno ama berri aan helno gacanta shacabka ayay soo geli doonaan, waana lala xisaabtami doonaa, qalbigiina kheyr u sheega, Maxkamadda Milateriga ayaa loo xilsaaray, go’aankeeda ayaa sugeynaa, dhammaan howlaheeda inay wadato ayaa raieynayaa horayna waa u faray, haddana waa farayaa sida ugu dhaqsiyaha badan u bilowdaan, cadaaladaas ayaa na wada deeqdo” ayuu yiri Raysal wasaare Rooble.
  1.