Madaxda Dalka oo Tacsi Tiiraanyo Leh u Dirtey Qoysaskii Eheladii Qarabadii iyo Qarankaba Geeridii Ku Timid Saraakiisha iyo Ciidanka G-12ka April.

Madaxweynaha  dowladda Soomaaliya  Maxamed Cabdullaahi Farmaajo ayaa ka tacsiyeeyay geerida ku timid Taliyihii, Abaanduulihii iyo askar ka tirsan Qaybta 12-ka Abriil ee ciidamada xoogga dalka Soomaaliyeed kuwaas oo ay miino dhulka lagu aasay kula qaraxday meel u dhaw deegaanka Dhanaane ee Gobolka Shabeellaha Hoose.

“Innaa Lillaahi Wa Innaa Ileyhi Raajicuun. Anigoo ku hadlaya magaca Jamhuuriyadda Federaalka Soomaaliya iyo kaygaba, waxaan tiiraanyada la qaybsanayaa qoyskii, ehelladii iyo shacabka Soomaaliyeed ee ay ka geeriyoodeen taliyihii Qaybta 12-ka Abriil Marxuum Janaraal Cumar Aadan Xassan (Cumar Dheere), Abaanduulihiisii Marxuum Janaraal Cabdi Cali Jamaame iyo askartii kale la geeriyootay.”

“Labada Janan iyo askartii kale ee ku shahiidday qaraxan waxay waqtigoodii iyo naftoodiiba u hureen soo celinta nabadgelyada dalkooda, waxayna dadaal badan galiyeen sidii Soomaaliya looga sifeyn lahaa kooxaha argagixisada ah.

“Waddani-yiintan naftood-hurayaasha ah waxaa lagu xasuusan doonaa kaalintii ay ka geysteen xoreynta deegaanno badan oo hoos yimaadda Gobolka Shabeellaha Hoose.” Ayuu yiri Madaxweynaha.

Madaxweyne Maxamed Cabdullaahi Farmaajo ayaa labada Janan iyo askartii kaleba Eebbe uga baryay in uu naxariistii Jannatul Fardowsa ka waraabiyo, qoyskii iyo ehelladii ay ka tageenna uu sabir iyo iimaan ka siiyo.

Sidoo Kale Waxaa Tacsi Taa Lamid ah Direy R/wasaaraha Soomaaliya Xasan Cali Khayre,Wasiiro iyo Xildhibaano ka kala Tirsan Labada Aqal Iyagoo Alle Uga Baryey Labada Janan iyo Askartaba Naxariistiisa Qoysaskii iyo Qarankii ay Ka Baxeena Samir iyo Iimaan Allaha Ka Siiyo.

Ururka Al-Shabaab ayaa sheegtay mas’uuliyadda qarax miino oo maanta ay la eegteen gaari ay la socdeen Taliyaha qeybta 12-ka April iyo Abaanduulaha Qeybta, agagaarka deegaanka Dhanaane ee duleedka Koofureed Muqdisho.

Share on Facebook